កូនកំលោះ សរសៃប្រសាទ មុនចូលរោងការ១ថ្ងៃ លោតទឹកសម្លាប់ខ្លួននៅស្ពានគីហ្ស៊ុណា
20-March-2016 | ដោយ មែន កំសត់
កំពង់ចាម ៖ ពិធីមង្គលការមួយគ្រោងធ្វើឡើងនៅថ្ងៃទី១៩ មីនា ២០១៦ ក្នុងសង្កាត់បឹងកុក ក្រុងកំពង់ចាម តែត្រូវបានអាក់ខានទៅវិញ ដោយសារតែជំងឺសរសៃប្រសាទកូនកំលោះរើឡើងខ្លាំងពេក ធ្វើដំណើតមកលោតទឹកពីលើស្ពានគីហ្ស៊ុណាប៉ងធ្វើអត្តឃាត បញ្ចប់ជីវិត ។
លោក ម៉ៅ ឡុក នាយនគរបាលប៉ុស្តិ៍រដ្ឋបាលវាលវង់ បានឲ្យដឹងថា កូនកំលោះឈ្មោះ ពេជ្រ ជ័យដារ៉ា អាយុ២៦ឆ្នាំ មានស្រុកកំណើតភូមិកោះក្របី ឃុំព្រែកថ្មី ស្រុកកៀនស្វាយ ខេត្តកណ្តាល បានចាកចេញពីស្រុកកំណើតមកស្នាក់នៅជាមួយគូដណ្តឹងក្នុងភូមិទី៣ សង្កាត់វាលវង់ ក្រុងកំពង់ចាម មិនទាន់បាន១០ថ្ងៃនោះទេ ។
លោកនាយនគរបាលបន្តថា ខណៈពេលស្ថិតនៅក្នុងបន្ទប់សុខៗ បែរជាកូនកំលោះត្រូវបានជំងឺសរសៃប្រសាទរើឡើង ក៏រត់ចេញមកក្រៅផ្ទះសំដៅទៅលើស្ពានគីហ្ស៊ុណាកាលពីវេលាម៉ោង១១ និង៣០នាទីយប់ថ្ងៃទី១៨ មីនា ២០១៦ ។ ហើយក៏បានឡើងលើបង្កាន់ដៃស្ពានលោតទម្លាក់ខ្លួនចូលទៅក្នុង ទឹកទន្លេមេគង្គ ធ្វើអត្តឃាតដើម្បីបញ្ចប់ជីវិត តែបំណងប្រាថ្នាមិនបានសម្រេច ដោយសារខ្លួនចេះហែលទឹកក៏ផុសចេញពីផ្ទៃទឹកមកវិញហើយប្រឹងប្រែង ហែលសំដៅមកច្រាំងទន្លេ បង្កឲ្យមានការភ្ញាក់ផ្អើលដល់សមត្ថកិច្ចចុះទៅជួយអន្តរាគមន៍ ដោយនាំអ្នករងគ្រោះមកសង្គ្រោះនៅគ្លីនិកឯកជនក្បែរស្ពានគី ហ្ស៊ុណា ។
នៅក្នុងហេតុការណ៍ដែលមិនទាន់កើតឡើងនោះ ស្ត្រីជាគូដណ្តឹង និងអ្នកជិតខាងបានរត់មកតាមដែរ តែរត់តាមមិនទាន់ បានត្រឹមតែប្រកៀកប្រកិតប៉ុណ្ណោះ ។ លោកនាយនគរបាលបានបញ្ជាក់ថា រហូតមកដល់ព្រឹកឡើងថ្ងៃទី១៩ មីនា ក្រុមគ្រួសារសាច់ញាតិខាងអ្នករងគ្រោះបានមកយកត្រឡប់ទៅ ស្រុកកំណើតវិញ ហើយពិធីមង្គលការដែលគ្រោងប្រព្រឹត្តិទៅនៅថ្ងៃទី២០ មីនា ២០១៦ ត្រូវបានអាកខានទៅវិញ ដោយសារតែកូនកំលោះមានជំងឺបែបនេះ ។
ដំបូងៗភាគីខាងកូនក្រមុំប្រុងឲ្យភាគីខាងកូនកំលោះសងថ្លៃ បណ្ណាការដែរ តែនៅពេលដែលពិនិត្យឃើញពីស្ថានភាពកូនកំលោះមានជំងឺដូច្នោះក៏បាន សម្របសម្រួលគ្នាបញ្ចប់បញ្ហា ពោលគឺពិធីមង្គលការបានក្លាយទៅជាពិធីជប់លៀង ៕
ចំនួនអ្នកទស្សនា
- ថ្ងៃនេះ6551
- ម្សិលមិញ15681
- សប្តាហ៍នេះ65391
- ខែនេះ87271
- ឆ្នាំនេះ87271
- សរុប20529727